ILOILO CITY-Nagpatigayon sang pila ka aktibidad ang mga progresibo nga grupo sa Iloilo kadungan sang komemorasyon sang ika-52 nga anibersaryo sang deklarasyon sang martial law subong nga adlaw.
Sa interview sang Bombo Radyo kay Mr. Elmer Forro, secretary general sang Bayan-Panay, iya ginpahayag nga pila sa aktibidad amo ang forum kaupod ang sektor sang mga mangunguma agud hatagan igtalupangod ang nagakatabo nga pagpang-agaw sa ila nga duta nga ginaumahan.
Suno kay Forro, may ginhiwat man nga candle-lighting ceremony sa atubang sang Iloilo Provincial Capitol kaupod ang Archdiocese of Jaro.
Nangin kabahin man sang aktibidad ang mga unibersidad, kaupod ang Western Visayas Youth and Students Alliance nga organisasyon sang mga youth kag student leaders.
Ginpahayag ni Forro nga bisan 52 ka tuig na ang nakaligad, buhi gihapon ang martial law bangud sa maeksperyensiyahan nga pagpang-abuso sa tawhanon nga kinamatarung, krisis sa ekonomiya, kag manubo nga sweldo sang mga mamumugon.
