Wala nakatambong ang National Grid Corporation of the Philippines (NGCP) sa committee hearing nga ginpatigayon sang Sangguniang Panlalawigan may kaangtanan sa mataas nga electricity rate sa probinsya sang Iloilo.
Base sa August 2024 nga data, may pinakamataas nga rate ang ILECO 1 nga may P16.31/kwh, ginasundan sang ILECO 2 nga may P14.49/kwh kag ILECO 3 nga may P11.84/kwh.
Suno kay Iloilo 2nd District Board Member Rolito Cajilig, ang pagpatawag sang committee hearing ang may katuyuan nga masabat ang tanan nga palamangkutanon ilabi na agud nga mabatian ang paathag sang tagsa ka electric cooperative kag amo man ang sa NGCP.
Ginkumpirma naman ni Ex-Officio Board Member Ramon Sullano, Chairman sang Committee on Public Utilities nga ginpadal-an nila sang sulat ang National Grid Corporation of the Philippines kag ginpahayag nga may representative sila nga ipadala sa persona ni Engr. Lazaro Dela Cruz, District Senior Manager- Sta. Barbara sang NGCP apang wala ini nakatambong sa committee hearing.
